Tura, April 15: Ia chang GHADC election-o GHADC-ni gimik dam 29 seat-rangoniko Congress dol dam 12 aro NPP dam 11 seat-rangko cherikaha.
BJP dolba ia chang seat damgniko cheaha aro Independent candidate-rangba Zikzak, Wagesik aro Rochonpara constituency-rango cherikskaaha.

GHADC election-o Congress dol bang•bate seat-rangko cheahaoba GHADC-o gital executive committee-ko rikna gita GNC-ni saksakamkam chegipa candidate baksana sakgittam Independent candidate-rang, NPP baksa bakrimnaba gnang indiba da•o dipet iani bidingo name talbrekujaenga ine u•iataha.

Tura constituency-o BJP-ni candidate Bernard Marak, NPP-ni candidate Semford B Sangma-ko chee Tura-ni gital MDC-na seokako man•aha aro Rochonpara-oba Independent candidate Arbinstone Marak, GHADC-ni gitcham CEM Dipul R Marak-ko cheskaaha.

NCP-ni dilgipa Saleng A Sangma-ba ia election-o Babelapara constituency-oni susae, skanggipa changna NPP-ni candidate ong•e susaanggipa Rakesh A Sangma-ni jako amako man•aha.

West Garo Hills a•jani a•kawe jolo donggipa Shyamnagar constituency aro Balachanda constituency damgnikon Congress cheskaaha. Shyamnagar constituency-o Congress dolni candidate Habibur Rahman aro Balachanda-o Congress dolni gitcham dilgipa Clement R Marak sagini depante Aggasi R Marak cheaha.

Ia chang GHADC election-o Muslim candidate sakgni chegipa ong•na man•aha aro uamangara Zikzak constituency-ni Independent candidate Aktar Ali aro Shyamnagar-ni Congress candidate Habibur Rahman ong•a.

Congress dolni dilgipa Zenith Sangma-ni jikgipa Sadhiarani Sangma-ba Dengnakpara constituency-o gnigipa changna seokako man•taiaha aro GHADC election-o susagipa me•chik candidate-rangoni uasan chu•sokgipa ong•na man•aiaha.

Ia chang GHADC election-o amako man•rikgipa GHADC-ni gitcham dilgiparangara, Damas-ni NPP candidate Dolly Sangma, Williamnagar-ni NPP-ni candidate Denang Sangma aro gipinrang ong•a.

Ia chang amako man•rikgipa Dolly Sangma-ra GHADC-ni gitcham deputy CEM ong•achim aro Denang T Sangma-ra GHADC-ni gitcham chairman ong•achim.