Tura, Dec 17: Garo Hills Autonomous District Council (GHADC)-o kam ka•enggiparang, ru•utbea jarangni dormaharangko man•kujae neng•nikanirangko chagrongna nangtokengoba, da•o jagnini dormaharangko on•na gita tangka paisarangko sandiengaha ine GHADC-ni Administrator parakataha.
GHADC-ni Administrator Dr Vijay Kumar D-ni parakatani gitade, GHADC-o kam ka•enggiparang, an•tangtangni man•na nangkuenggipa chu•gimik dormaharangko on•china dabiengoba da•o GHADC-o tangka paisarang dongjani a•sel chu•gimik dormaharangko on•na gitade chol ong•teljaenga aro da•o jagnini dormahako on•na gita tangka paisarangko sandiengaha.
“GHADC-o kam ka•enggiparangna 2018 bilsini July aro August jani dormaharangko gitcham pay scale-o pangchake on•anggen,” ine Dr Vijay Kumar parakataha.
Special Plan Assistance-ni ning•o GHADC-na chamatenggipa gong kror 18-oniko dormaha on•china dabienggipani bidingo janapatengon, ia tangkarangko dingtang dingtang namroro silroroatani scheme-rangna miksongesa chamatengani gimin ia tangkarangkode dormaha on•na gita jakkalna man•jawa ine GHADC-ni Administrator parakataha.
GHADC-o kam ka•enggiparangni man•na nangkuenggipa dormaharangko on•china aro GHADC-ni da•o Secretary ong•enggipa Rikse Marak-ko kamoniko ra•galchina gita dabie GHADC-o kam ka•enggiparang kamtangtangko ka•gija office mikkangon jingjengatengachim ine nikna man•a.
“Chingna revised pay scale-o da•o komibeoba jagittamni dormahako on•na nanga aro GHADC-ni secretary ong•enggipa Rikse R Marak-ko ta•raken kamoniko ra•galchina chinga dabienga. Chingni ia dabianirangko knachakjagenchimode chinga January jaonaba jingjengatanggen,” ine Non-Gazetted Employees Association (NGEA) parakatahachim.
