Shillong, Dec 17: Meghalaya a•doko BJP dolchi dilenggipa Unit-ni mongsonggipa dilgipa Pa AL Hek da•al sal Meghalayani Governor Pa Satya Pal Malik-ko Raj Bhawan, Shillongo grongaha. Grongani mongsonggipa miksonganide ian NE HU-na Vice Chancellor-ko a•doktangni mandeko on•china aro me•chik ong•ode nambata ine miksongsoe donmanaha.
NEHU salgro salaram jolgimikni manderangni skie ra•chakrram ong•ani gimin iako Delhi-ona re•angon HRD Minister baksa agangrike a•doktangni mandekon on•china golpogrikon nambatgen ine Pa Hek aganaha. NEHU-ni bidingo agangrikan baksa ILP-ni bidingoba Prime Minister aro Home Minister baksaba agangrikchina mol•molaha. Uni minggipin golpogrikaniara ian bobil dol HNLC-ni bidingoba ong•jolaha.
