Tura, Dec 29: Garo Hills Autonomous District Council (GHADC)-o kam ka·giparangna jagnini dormaharangko on·na ku·rachakahaoba Krismasna skang man·jahani a·sel kam ka·giparang dormaha gri Krismasko manina nangtokaha.
Koborko on·ani gitade, re·anggipa December 23 tarik attamonin State Bank of India (SBI)-o kam ka·giparangba chuttiko man·ahani a·sel GHADC-o kam ka·giparangna Krismasna skang dormaharangko on·na man·jaha.
Non-Gazetted Employees Association (NGEA)-ni u·iatani gitade, GHADC-o kam ka·enggiparangna jagnini dormaharangko on·na ku·rachakahaoba Krismasna skangba on·na man·jaha aro Krismas matchotani ja·manoba dormaharangko on·na man·kujaenga.
“Krismas matchotani ja·manoba district council-o kam ka·enggipa darangan jagnini dormaharangko man·kujaenga,” ine NGEA-ni dilgiparang parakataha.
Indake ong·genchimoba, GHADC-o kam ka·enggiparangna Krismasna skang jagnini dormaharangko on·na man·jahani gimin GHADC-ko chalaienggiparang, NGEA-ko matnangatskaaha.
“GHADC-o kam ka·giparangna 2018 bilsini July aro August jani dormaharangko on·na ku·rachakahaoba NGEA-ni dilgiparang an·tangtangan dormaharangko ra·jachina kam ka·giparangko didie administration-ni kosako jingjengataha aro iani a·selsa Krismasna skang kamrangko ka·srapjae dormaharangko on·na man·jaha,” ine GHADC-ko chalaienggipa administration-oni parakataha.
Indake ong·engon, December 23 tarik attamonin bank-rang kamko ka·jahani a·sel GHADC-o kam ka·giparangna dormaharangko on·na man·ningjaenga ineba GHADC-ko chalaienggipa administration-oni parakataha.
“December 22 tarikonisa chinga dormaharangni bill-rangko tarina man·ahachim indiba bank-ko December 23 tarik attamonin chipna a·bachengaha aro December 28 tarikosa kulipilaha,” ine GHADC-ni account official-rang parakataha.
December-ni 30 tarikoba U Kiang Nangbah-ni siani salna a·dok gimikon chuttiko man·taiengani gimin aro December-ni 31 tarikba bilsini bon·kamgipa sal ong·engani gimin da·o GHADC-o kam ka·enggiparangnade bilsi gitalna skangba dormaharangko man·na ka·dongani dongskajaengaha ine nikna man·a.
