Tura, March 10: Chu·gimik ja 31-rangni dormahako on·chipjani gimin jegale jingjengatenganio, Garo Hills Autonomous District Council (GHADC)o kam ka·enggiparang re·anggipa March 3 tarikoni GHADC office-ni napram cholgugao jinma asonge jingjengataoni joljol dontonggija uamangni tik ka·gimin gita Butbar saloni okgimu chake jingjengataniko a·bachengatskaaha.
NGEA re·anggipa February 18 tarikoni da·alona kingking kamtangtangko ka·gija uamangni man·gnigipa dormaharangko on·china dabie jingjengataniko dakangahaoba a·dok sorkarini knachakjaengani gimin NGEA-ni dabianiko chu·sokatkuja dipetna sima-ari dongija okgimu chake jingjengatanggen ine NGEA-ni padot Senora Johny Arengh koborna parakataha.
Janapjolna gita, uamangni dabiako on·na sorkarini gisiko nangjaengani gimin GHADC-o kam ka·enggiparang Butbar saloni Sukrobar salona pring 10 bajioni attam 5 bajiona okgimu chake jingjengatna tik ka·aha. Iani gisepon a·dokni skotong minister, GHADC-o kam ka·enggiparangna maming ka·dongatani kattako seachi parakatkuja dipet mikkang anti Sombar sal, chong·motan March 15 tarikoni sima dongija chu·gimik konta 24-na kingking okgimu chake jingjengatangskana gitaba NGEA-ni dilgiparang parakangaha.
“Chinga sima dongija okgimu chake jingjengataniko dakengon, je ka·rimskarangoni bilsi 50 aro 60 ong·gipa ba batgipa me·chikma-me·aparang, bi·sa chona donggiparang, an·o donggiparang aro jak-ja·a sa·dike re·na-dona man·gijagiparangkode watchangenga, indiba jemangan GHADC-o kam ka·enggiparangni duk chakako nike ka·sachakenggipa manderang aro NGO-rangni re·bae bak ra·aniko chinga rimchaksoa” ine NGEA-ni jakrikra Pa Brithen M. Sangma janapatskaaha.
Indake skanggipa salo NGEA-ni okgimu chake jingjengatanio maming a·sel grian name tom·tome matchotangaha.
