Tura, March 10: Re·baenggipa April 12 tariko Garo Hills Autonomous District Council (GHADC)na pu·onataniko ong·atnasiengani gimin, a·jao eleksinko tom·tom aro kraa bewalo name ong·atangna man·na gita West Garo Hills-ni District Magistrate, Model Code of Conduct (MCC)ni niamko West Garo Hills district jol gimikon ra·gatataha.
Section 144 CrPC-ni ning·o ge·etanirangko on·angkuengon, West Garo Hills-ni District Magistrate re·baenggipa April 15 tarik Bristibar salona, chong·motan vote-rangko chanani tarikona district gimikon license donggipa slaiko man·chape slai jakalanirangkoba chu·gimik champenge niamko donataha. Indake ong·oba, eleksinni somoio niam aro ge·etanirangko nirokna donata man·gipa kamtango ong·gipa chelchakgipa sipairang, police iamangko ia ge·etani ning·o man·chapatja, ine ge·etaniko ong·anggipao janapjolaha.
Eleksinni somoio mande sakbonga ba una bate tom·dakaniko ia on·gimin somoio district-ni je biapoba raken champengataha aro eleksinna campaign ka·anio nangchape re·jomani ba rally ba tom·anirangko ong·atna skangba political dolrang ba susaenggipa candidate-rang somoina skange Tura, Deputy Commissioner-ni Office, Law and Order/ Model Code of Conduct Cell-oniko bil on·aniko ra·chengna nanggen.
Ia apsandakgipa champengataniko Section 144 CrPC-ni ning·o South Garo Hills District-onaba a·jani Deputy Commissioner, Pa W Nongsiez, Butbar salo on·angaha.
Ge·etanio, sorkarini biaprango jeoba pakmarango seani, poster tapani ba jegalani ong·gipa jeni giminba lekka pal·tak aro banner-rango see tapani ba minggipin dakgipako songanirangko champengataha. District Election Officer-oniko bil on·aniko ra·chenggija mande nokrango aro para salgipa garirango nisanrangko songani ba banner-rangko tape mesokanirangko champengataha aro eleksin matchotjujana kingking South Garo Hills a·ja gimikon jedakgipa slairangko jakkalanikoba raken champengataha. Apsandaken, niamko ja·rikatenggipa jekai police personnel, Home Guards, Forest Personnel, BSF aro chelchakaniko on·enggipa ramram manderangko ia ge·etanirango man·chapatjaha.
Ge·etanganio, sakbonga ba una bate apsan biapo jinma tom·dakanikoba South Garo Hills district jolgimikon champengatkuaha.
Indake ong·engon, Garo Hills a·jani gipin district-rangoni East Garo Hills, North Garo Hills aro South West Garo Hills-rang gimiko man·chape Model Code of Conduct (MCC)ni niamko ua biaprangoba ra·gatataha.
