Baghmara, Dec 4: West Garo Hills a·jani Dalu skulo poraienggipa me·chik bi·sa saksani manggisiko Sonibar salo police-rang, South Garo Hills a·jani Dimapara songoniko man·aha. Ia me·chik bi·sa, Dalu skulni Class 10-o poraiengachim aro ua December 1 tarikonin noktangona sokangpilkujaengachim.

Dalu police-rangni u·iatani gitade, ia bilsini 17 ong·gipa me·chik bi·sa, December-ni 1 tariko, an·tangni selection test-ko sena gita skultangona re·angahachim indiba ua salonin ua noktangona sokangpiljahachim. Uni gimaani ja·man uni nokdangni manderang, Dalu police station-ona re·ange, Sukrobar salosa uni gimaani bidingo police-rangna koborko on·eaha.

Indake ong·engon, ia me·chik bi·sani manggisiko Sonibar pringo police-rang, Dimapara jolo donggipa Dangsa Adu songoniko man·aha ine kobor on·aha.

Ia me·chik bi·sako drae til·ekani ja·man so·ote galahakon ine chanchipengani gimin police-rang, ia a·selni bidingo ning·tue sandianirangko dakna a·bachengataha.