Shillong, Aug 1: A•gilsako sosibatsranggipa aro rona an•senggipa Sohra-ona pangna bilsian dingtang dingtang biaprangoni tourist-rang rona re•barongengoba da•o Meghalaya a•doko gipin biaprangoni re•baenggipa manderangoniko dingtang dingtang dolrang, sakkina lekkarangko sandirongengani a•sel ia biapo rona re•bagipa manderangko nikna gita man•angjaengaha aro iani a•selan ia jolrango dokkan dake aro bading chiwale cha•enggipa manderangnaba nangchakeaniko ra•baskaengaha.
Sohra jolrango songdongenggipa bang•bata manderangan gipin biaprangoni re•baenggipa manderangko sokachakanio, cha•ani ringanirangko pala sim•anio aro tourist-rangko re•dilanio pangchakgiparangsa ong•ani gimin tourism-o pangchakgiparang ong•a indiba batanggimin salrangonin gipin biaprangoni re•baenggipa manderangoniko dingtang dingtang dolrang, nanga lekkarangko am•sandiengani gimin aro mitamrangkode a•dokni cholgugarangon champengsoengani gimin da•o Sohra jolrango rona re•bagipa manderangko bang•e nikna man•angskajaengaha.
Adita salrangna skangmangmang Hub News-ni dolsa manderang, mingsinggipa Sohra-ona re•angon, ia jolrango pangna gapronga gita manderangni gapako nikna man•jaha. Pangnande salarion, ‘Noh Kalikai’ gita dakgipa biaprango ritchani ritcha manderangko nikna man•rongachim indiba da•ode ia biaprango sak 10 ba sak 20-mangni gitasan nikna man•skaengaha.
Sohra-ona dakanggipa ramao donggipa Mawkdok-oba pangnande manderangni bang•e roanirangko nikna man•rongachim indiba da•ode ia biapo bang•gija manderangni roakosa nikna man•skaaiaha. Ia ramao manderang bang•en neng•take rorongani gimin ia biapo me•rakku so•e palgiparang bang•en laprangko man•rongachim indiba da•o ia biapo me•rakku so•e palenggipa me•chik saksa palnangjaengani gimin an•tangni suk ong•gijaniko parakataha.
Apsan daken, Noh Kalikai-o Khasirangni bija bitchi aro ma•manti bosturangko pale cha•enggipa manderangba da•o bosturangko palnangjaengahani gimin suk ong•gijaniko parakattokaha.
Re•anggipa July-ni 26 tariko Hynniewtrep National Youth Federation (HNYF)-ni membor-rang, a•dokona niam gri re•napbaenggipa manderangko nirok sandina ine Assam-oni re•baenggipa tourist taxi-rangko champengsoenba, Sohra aro Dawki gita dakgipa biaprangona re•angna on•jahachim.
Ja•mano Police aro District Administration-ni official-rang, ua biapona re•ange, NGO-rangni am•sandianiko champengatenba garirangko re•napbana on•ahaoba Assam-oni re•baenggipa bang•bata garirangan, obostarang namjabatangna kene a•doktangona re•pilangtokaiaha.
Iandakgipa a•sel ong•ani ja•man, Meghalaya a•dokona, mongsongbate tourist-rangni rochakgipa biaprangona gipin biaprangoni rona re•bagiparang rang•san komiangaha aro iani a•sel da•o ia biaprango bading chiwale aro ma•manti dokkanrangko dake cha•enggipa manderangsa janggi tanganio neng•nikanirangko chagrongna nangskatokengaha.
Na·simang ia video-koba nina man·gen:
Na·simang iakoba poraina man·gen: Class 10-o poraienggipa chatro-ni dingdee donggipa manggisiko school hostel-oniko nika
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.co
Instagram- https://www.instagram.com/ne_media_hub
For news & updates, Download Hub News App from Google playstore
