Shillong, Feb 8: Petrol aro diesel toni damrang da·o ritchasa nanggitotna am·pile bariahani gimin sorkarini kosako jegale jingjengataniko dakenggipa Meghalaya Joint Action Committee of Commercial Vehicles (MJACCV), da·o gipin organization-rangni krimkro chakpaaniko man·skaienga, jemangan petrol aro dieselni damko litre prako gong 2 ka·e a·dok sorkarini komiatara chu·ongbea ong·ja ine agananirangko knana gita man·skaienga.
Janapna gita, joint action committee-ni a·doko jingjengataniko ong·atenganiara petrol aro diesel toni damrang gong·raken tang·doahaniko jegalan baksa sorkarina kajinako gamna nangachi bal-boja ong·enggipaoniko 50 percent-mangko komiatchina dabijoleming mija anti Butbar saloni intal songjinmao parana salruraenggipa gari-gorarangko wataniko champengatna gita a·bachengaha.
Iani bidingo da·al Sombaro tom·e koborni manderangna aganengon, petrol aro dieselni damrangko komiatchina JAC-ni dabienganio chinga uamangna chu·gimikan chakpaaniko on·a ine The Ultimate Legend Bikers’ Association (TULBA)ni padot Seiborlut Lyngdoh Nongbri parakataha.
“MDA sorkari manderangni neng·nikaniko dal·e ra·ja aro iana aganchakani dongja ine aganengon, toni damrangko tang·dorikrikatani a·selan manderangni salantio nanggipa bosturangni damrangba tang·doaha aro iana a·dok sorkari maikobade dakna nanga,” ine ua aganaha.
Songjinmao gari taxi salenggiparang ramana kajinako gaman baksa insurance ba ugita gipinrangnaba korosrangko galna nangkua ine uamangna chanchichake agananga baksana Lyngdoh, da·omiting porikka ba test-rangko ra·ani somaio iarangchi poraigiparang namen neng·nikaniko chagrongna gita nangtokenga ineba agandapaha.
Lyngdoh-ni aganarangko ja·rikpae, All Meghalaya Labour Union-ni padot Danny Dunai-ba toni damko da·o litre prako gong 2 ka·e komiate mangmande namgniko on·jawa, uni pal damrangni bidingo agan-golporimna gita sorkari, joint action committee-ko okamna nanga ine aganenba, maibakai a·dok sorkari ia dabiako chu·sokatjaode union uamangni kam ka·aniko dontongatgen ineba ua mikrakatjolaha.
