Shillong, July 26: Meghalaya a•dokni saksa gitcham MLA Kennedy Khyriem, Mongolbar salo National People’s Party (NPP)-o napangaha aro uko NPP-ni national president aro Meghalaya a•dokni Chief Minister Conrad K Sangma NPP-ona rimchaksoaha.
Re•baenggipa 2023 bilsini Meghalaya Assembly election-o Kennedy Khyriem, Mawphlang constituency-oni NPP-ni candidate ong•e susagen ine ia tom•anio Conrad Sangma parakataha.
Gitcham MLA-ko NPP-ona rimchaksona gita tom•aniko ong•atanio NPP-ni national president, jinmana aganprakangengon, re•baenggipa 2023 bilsio NPP, dolsanchi sorkariko rikgen ine parakangaha.
An•tangtangni kamo chu•ongnike dongaigija kamrangko rakbate ka•china gitaba ua NPP-ni dilgiparangko aro kam ka•giparangko didiangaha.
