Williamnagar, July 26: Williamnagar songjinmani bakrimgimin dolrang jedake GSU, FAF, FKJGP, AIGU, WGCSU, Auto Association aro Williamnagar Sumo, Pick-Up Association dolrang, a•jao bijoliko tik ong•e watjanina MeECL office-ni kosako jeteanirangko salbrina dakna tik ka•e da•asaloni jingjenganirangko a•bachengataha.
Bakrimgimin dolni manderangni dabianirangko on•gimin sal somoini gisepo chu•sokatjagenchimode mikkangchiba sorkarini kosako sinjetanirangko on•angkugen ine Williamnagar Eastern Zone-ni Garo Students’ Union-ni President Saljrang Tenggrik R Marak u•iataha. Uandake uamangni jeteanirango bakrimaniko on•pachina Williamnagar-o songdongenggipa sakantikon mol•molatenga.
A•jao salantian bijoliko chu•onga gita watjanina namnikgijaniko parake aro skatang je somoiba bijoli sisimani a•selrangna bang•bea neng•nikanirangko chagrongna nangenganina GSU, FAF, FKJGP, AIGU, WGCSU, Auto Association aro Williamnagar Sumo, Pick-Up Association-ni bakrimgimin dol dingtang dingtang dabianirangko dakdilenga.
Garo Hills a•jao bijoliko skatang mamung neng•nikani ba a•sel gri siatanirangko bon•atchina ba dakjachina aro Power Department-o mandetangrangko mikkang nitee kamna rimnapanirangko bon•atchina dabienga. Un’ baksana Garo Hills-ni MeECL Department-o chu•onga gita kamo mande rimnapchina aro department-ni matchotjaenggipa kamrangko niroke matchotatna kamna mande rimnapna nanganirangko dakchinaba dabianiko dakenga. 2020 aro 2021 bilsirango Khasi Hills-ona kamna rimnapani bidingoba aro Garo Hills-ni manderangko Khasi Hills-ona jat basee kamoniko biap ra•jujaanina aro Head Office, MeECL Shillong-onaba A•chikrangko kamna rimnapani dongna nanga ineba dabianiko dakenga.
