Tura, May 16: Adita salrangna skang, gital manderangko rimchimongtaienba A·chik bobil dol, Garo National Liberation Army (GNLA)-ko ong·katataina jotton ka·engani chittiko police department-ni adita salrangna skang man·sogipani bidingo a·dokni skotong minister Pa Conrad K Sangma, ia ning·joljol man·sogipa koborko chekani ja·manosa ja·kurangko de·atgnini gimin Mongolbar salo aganangaha.

Bobil dolni ong·kattaiani gimin kobor ra·timgiparangni sing·anina aganchakangengon, Pa Sangma, ian ning·joljolgipa koborsa ong·engani gimin aro batanggimin changrangoba apsandakgipa koborrangkon dingtang dingtang gadango man·sorongengani gimin ua da·odipet ia report-ko nia dongkuja ine aganenba, ia mamlani bidingo uamang bang·gija salni gisepon chanchirimaniko dakna gita aganangaha.

Ia mamlara namen chanchina nanggipa ong·enga ine skotong minister, sing·anina aganchakangkuenba, a·doko bobil dolni ong·kattaiani jedakgipa koborrangko man·sogenchimoba uarangko skanggipa namedake chekna gita nanggen maina, bang·en ning·joljolgipa koborrangko sorkarini gita batanggimin somoirangoba man·soronga, uni ja·manosa a·dok sorkari nanga gita ja·kurangko de·anggen ineba Pa Sangma talatangaha.