Shillong, May 16: Mongolbar salo, Jaiaw Presbyterian Higher Secondary School-ni bilsi 100 gapaniko manianio, Meghalaya a•dokni Chief Minister Conrad K Sangma-ba bak ra•angaha aro unbaksana Meghalaya State Planning Board-ni Chairman Metbah Lyngdoh-ba bakko ra•angaha.
Ia skulni bilsi 100 gapaniko manianio a•dokni Chief Minister, jinmana aganprakangengon, ia skulko a•bachengataoni indita bilsirangna kamko ka•anggipa managing committee-ni membor-rang aro skigiparangko mittelpilangenba, ia skulko kulianichi bi•sarangna aro mongsongbate chol ong•pagijagipa manderangna bang•en dangdike on•aha ine parakataha.
Ia salara ia skulni batanggimin bilsirango chu•sokgipa ong•aniko gisik ra•pilani sal ong•enga ine janapatengon, mikkangchiba skulo poraienggipa chatro chatrirangna nambatgipa lekka porako on•na gita chanchisamsoani gnang re•mikkangangkuna nanga ine Chief Minister, skulni managing committee, Mondolini membor-rang, skulni gitcham chatro chatrirang aro ia skulo bak ong•enggipa pilak manderangnan didianiko on•angaha.
Lekka poraniko on•anio chagrongna nangenggipa neng•nikanirangko janapatengon, iandakgipa ra•bianirangko namatna kam ka•anio maming dakeba chatro chatrirangni poraianirango nangchakeaniko ra•bana nangja ine Chief Minister ku•pattianiko on•angaha.
Meghalaya a•doko dam 14,000-mang ong•na sipile skulrang aro sak 55,000-na baten skigiparang dongani a•sel salgro salaramni chonchongipa a•dokrangna batenga ine janapatengon, dingtang dingtang skulrangna a•dok sorkari, bilsio gong crore 2200-na baten koros ka•enga ine Chief Minister parakataha.
Ia skulni building-ko rikdapna gita Chief Minister’s Special Development Fund-oniko gong lak 20 tangkarangko on•gen ineba ia tom•anio Chief Minister parakataha.
