Shillong, April 5: Adita salrangna skang, Shillong songjinmani Golf Link-o chadambe sakgittamko kragija dake chadrapanio, chadambe sakgittamoni saksa siangna nangahani gimin ia a•sel ong•aniko jegale aro dos dakgipa manderangko ta•raken rim•china gita dabie Sombar salo, Golf Link jolo songdongenggipa manderang, Golf Link-o jinma tom•bimonge re•jomaniko ong•atangaha aro ia re•jomanio dingtang dingtang dolrang baksana Golf Link Dorbar Shnong-ni membor-rangba bakko ra•angaha.
Ia tom•bimonganio Golf Link Dorbar Shnong-ni membor Rocky Hek, jinmana aganprakengon, Shillong songjinmao Golf Link jolan tom•tombatsranggipa jol ong•a aro ia jolo Tribal-rang aro Tribal ong•gijagipa jatrangba pilakan ku•mong nangrime janggi tangtokenga aro pattalo pangnan bi•sa disarang kusi ong•e rorongachim ine parakangaha.
Ia biapo pangnan Cricket aro robolkoba manderang kal•e roronga indiba changsaba iandakgipa a•selrang ong•a dongkujachim ine janapatengon, ia a•sel ong•chakgipa biapara Golf Link-ni ning•tubatgipa biaposa ong•ani gimin ian mongsonggipa ramaoni namen chel•a aro ia a•sel ong•anio jak donggipa manderangko darangba ma•sina amjaenga ine Hek parakataha.
“Uni gimin chinga ia gittimko dilenggipa dolni pal, ia a•selni bidingo ta•raken ning•tue sandienba dos dakgipa manderangko rim•china, a•dokni Chief Minister aro Home Minister-ko mol•molatenga,” ine Hek aganaha.
South West Khasi Hills a•jao donggipa Wahkaji songoni chadambe sakgittam, kam ka•e cha•na gita Shillong songjinmaona re•baahachim indiba ia chadamberangko re•anggipa March-ni 21 tariko, ma•sina man•gijagipa manderang, Golf Link jolo kragija dake dokahachim. Dokako man•e saknaanirangko man•ahani gimin ia chadamberangko hospital-o done sannaniko dakengachim indiba uamangoni bilsi 20 ong•gipa Pherlangroi Myrthong, re•anggipa antini Robibar pringo NEIGHRIHMS-o janggi galahachim.
Ia a•selni bidingo name am•sandina gita sorkari Special Investigation Team (SIT)-ko songaha aro ia SIT, ia a•selko pilakni gitan am•sandiengachim.
