Shillong, April 1: Shillong songjinmani Golf links-o ong·anga obostara a·dokni dingtang dingtang jatrangni gisepo kajia ong·ani maming bak dongja indiba chu ringgipa manderangni gisepo ong·gipa kajiasa ine Pynthorumkhrah elakani MLA aro cabinet minister Pa AL Hek Butbar salo aganaha.
Shillong, Golf Links-o picnic-rang cha·na ba minggipin nanganirangna re·anggipa manderangna ba nokdangrangna maming naljokani grigipa biapsa ong·aiaha ingipa kattarangna aganchakengon, Golf links-ni Golf Course area ba Golf -ko kal·chakgipa biap gimikan private-ni gamsa ong·a aro Golf kal·ana agrede iako minggipin kamnade tarija.
A·gilsakni gipin bakrangchide Golf course-rang gimikan private field-sa ong·a minggipin kamrangna jakkalna man·ja indiba a·doko donggipa Golf links-o mongsonggipa rama dilgniko kasota dongani giminsa Golf kal·chakram biapo manderangko skatang napna cholko on·enga ong·jaode, ia Golf course-rangko Golf kal·nasan mangmang jakkalaigenchim ine Pa Hek agan-talataha.
Jolni saksa MLA ong·ani gimino, adita bilsirangna skangan Golf links-ko ripingna aro chelchakna nangani giminba ku·rangko on·baenggipa ong·a. Golf links-ni biap samtangtangon buring a·ja bang·ani a·selo changsanode gimikko niroksokja, uni gimin manderangni iano bakrimanirangko nangenga ineba minister agankuaha.
Ua ramarangko taritaina gita sorkari jotton ka·enga aro jensomoio kamrangko matchotahaon darangkoba Golf Course ning·ao napna on·jawaha ine u·iatan baksa, ua biap jolgimikkon chelchakgipa dolrang nirokjringenga indiba biapni namen apalani a·selo police-naba gimikchikode nirokatna namen neng·gipa kam ong·a indiba, biapko chelchakna, ripingna aro jolgimikkon rongtal-an·tale rakkina gita District authority-rang aro a·dok sorkari jottonrangde ka·enga ineba Pa Hek agandapataha.
Ua biapo ong·anga obostako ra·e mitam manderangni jatsa-jatgipinni gisepo nanggrikatna jotton ka·enggiparang dongengani gimin aganengon, ia mamlako mamingchiba dingtang dingtang jatrangni gisepona ra·bana nangja aro ian a·jao songdongkamgipa tribal jat aro gipin jatrangni gisepo kajia ong·anio maming bak dongja indiba ia pilakan ua biapo chu ringe rogipa manderangni gisepo ong·gipa kajiasa ine talatan baksa, iani giminan East Khasi Hills-ni Superintendent of Police, Sylvester Nongtnger-o koborko ra·aton uaba biapo ringe-cha·e rogipa manderangni gisepo ong·gipa kajiasa ine u·iataha, ine cabinet minister taldapataha.
Indake ong·engon a·dok sorkarinade, gimik jatan, gimik toroman apsan ong·a aro maming mikkang niteani grian pilak jatan a·doko songdongkamgipa manderang ong·a ineba a·dokni Health Minister Pa AL Hek aganangkuaha.
