Tura, June 24: Jal Jeevan Mission (JJM)-ni ning•o ra•gate tarienggipa Greater Garobadha Water Supply Scheme-ko matchotahaode Garobadha jolrango donggipa dam 96 songrangna chirangko chu•onga gita on•na man•gnok ine Bristibar salo Meghalaya a•dokni PHE Minister Renikton L Tongkhar, ia water supply scheme-ni kamrangko niangani somoio parakataha.
PHE Minister-ni parakatani gitade, ia Greater Garobadha Water Supply Scheme-ara Garo Hills-o dal•batsranggipa water supply scheme-rangoni mingsa ong•enga aro ia scheme-na sorkari gong kror 107 tangkarangko chamaha.
Ia Greater Garobadha Water Supply Scheme-ni kamrangko da•o tong•sakode matchotmanaha ine janapatengon, 2022 bilsini December jani gisepode ia jolrango donggipa nokantionan chirangko on•na man•na gita kamrangko somoi gita matchotatchina PHE Minister, ia Water Supply-ni kamrangko ka•enggipa contractor-rangna ge•etaniko on•angaha.
Ia Greater Garobadha Water Supply Scheme-ni kamrangko niangani somoio a•dokni PHE Minister baksana Selsella-ni MLA Ferlin A Sangma-ba dongpaaha.
