Baghmara, April 20: Garo Students’ Union (GSU), Southern Zone (SZ), Baghmara, April 20 tarik chong·motan Mongolbar salo GHADC-ni gital Deputy CEM-ko gronge una memorandum-ko on·angaha.
Iani bidingo GSU-SZ-ni padot Te Chuang Sangma-ni koborna u·iatani gitade, GHADC-ko namdapatchina mingbri dabianirangko segipa memorandum-ko Pa Nikman Ch. Marak-na on·aha ine u·iataha.
Union-ni mingbri dabianirangara, skanggipa GHADC-na dingtang Electoral Roll-ko tarichina, gnigipa, GHADC-o kam ka·enggipa Non-Gazetted Employee-rangna chu·gimik dormaharangko on·china, gittamgipao, mikkang changni MDC eleksinrango gipin jatrangni candidate ong·e susaanirangko aro vote pu·onanirangko champengatchina aro brigipao, ru·uta bilsirangoni ra·chakatgija donchipenggipa Garo Customary Law (GCL)-ko ra·chakate ba pass ka·e on·china gita ong·a.
Indake ong·engon, ia dabianirangko chu·sokatna gita jabri sal ba somoirangko nanggen ine adita salna skang Deputy CEM-na ku·mikchetanggipa Pa Nikman Marak, GSU-ni dilgiparangna ka·dongataniko on·aha ine union-ni padot Chuang Sangma janapatjolaha.
