Guwahati, Feb 16: Food Processing Industries Ministry baksana Assam sorkari nangrimenba, Food Processing Summit-ko Guwahati-o ong·atenga aro ia program-ko ong·atanio Food Processing Industries Minister Rameswar Teli-ba da·al bakko ra·angaha.
Ia tom·bimonganiko ong·atanio Rameswar Teli, jinmana aganprakangengon, India sorkarini dongimin niamrango pangchake, salgro salaram a·dokrango Food Processing sector ba cha·ani tariani kamrangko namdapatna gita Food Processing Industries-na chamenggipa budget-oni 10 percent-ko chame on·skaenga ine parakataha.
Da·o dipet gong kror 200-mangni dam 15 Food Processing unit-rangko Assam-o chalaienga ineba ua parakataha.
Assam-na gong kror 60-mangni Agro Processing Clusters (APC) Project-rangko on·manaha aro da·o ia apsan korosni APC project-ko a·bachengattaina siengaha ineba Food Processing Industries Minister parakataha. Teli-ni aganani gitade, Assam a·dokni Nalbari a·jao Mega Food Park-ko kulianichi ia jolrango janggi tangani gadang aro kam ka·e cha·ani cholrangba tang·doangaha.
Food Processing Industries Ministry-ni ra·gatgipa Pradhan Mantri Kisan Sampada Yojana (PMKSY)-ni ning·o salgro salaram a·dokrango dingtangmancha subsidy-ni gita namgnirangko man·enga ineba Teli parakataha.
Minister-ni aganani gitade, salgro salaram a·dokrango food processing unit-rangko kulina gita namgipa niamrang dongkujaengani gimin Food Processing Industries Ministry-o dingtangmancha Project Development Cell-ko kuliaha aro ia cell-an gisiko nanggipa manderangna ku·pattianirang baksana DPR-ko tarina aro gipin kamrangoba dakchake on·enga.
PMKSY aro PMFME-ko manderang altue man·na gita kamko ka·china Assam sorkariko didiangengon, ia Food Processing sector-ko namdapatanichi game ge·e cha·giparang an·tangtangni bosturangna namgipa damko man·gen aro mi misi minani ja·man indin bostu galaniko champengna man·gen ine Food Processing Industries Minister, an·tangni ka·dongchakenganiko parakangaha.
