Tura, Feb 16: Garo Hills Autonomous District Council (GHADC)-o kam ka·enggiparang gimik ja 29-ni dormaharangko man·kujaengani gimin so·sojengjeng ong·tokengon, Non-Gazetted Employee Association (NGEA)ni dilanichi da·al Mongolbaro GHADC-office mikkango tom·e chanchirimenba dingtang dake ja·ku de·aniko a·bachengatskana tik ka·angaha.
GHADC-o kam ka·enggiparangni tom·ao mongsonggipa chanchianiranga, skanggipao ‘Biometric Attendence Machine’-ko GHADC ofice-ona ra·baaniko dontongatchina didiangaha. Ia machine-ko ra·bana skangba chingni chu·gimik dormahako on·chengna nanga uni ja·manosa ia machine-ko tekchina, maina ia Biometric attendance machine-ko tekjokode chinga maming cha·a-ringa gri pring 10 bajioni attam 5 bajiona kingking kam ka·na nanggnok ine bilko jako ra·enggiparango dabiangaha.
Minggipinara, re·baenggipa April 9 tariko GHADC-na pu·onaniko ong·atnasienggipani gimin chanchion, GHADC-o kam ka·enggiparang gimikan ua eleksino bak ra·jawa ine chanchirimenba iani gimin election commissioner-na lekka sedona tik ka·angjolaha.
“Darangba chingni duk-mikchi ong·e cha·a-ringa gri kam ka·engako ma·siatja, noktango cha·a-ringa gri jik-dedrangko dongale chinga ua eleksino kam ka·na re·angjawa. Chingna dormaha on·na man·gija eleksino jakkalna baoni tangkarangko chamaha, una chamgipa tangkarangko chingna dormaha on·chengna man·achim. Uni gimin chingni man·kugijagipa chu·gimik dormaharangko man·ani ja·manosa chinga gital dake kamrangko ka·angtaigen,” ine NGEA-ni padot jinmana agan-parakataha.
NGEA, dukko chake kam ka·enggiparangni man·kugijagipa dormaharangko ta·raken on·china dabie dingtang dakgipa ja·kuko de·angskana tik ka·aha, indake re·baenggipa February 19 tarik, chong·motan Bristibar salo chingni suk ong·gijaniko mesokna, jinma re·jome jegalaniko dakna gita manchiaha. Jinma re·jomaniko pring 11:30 bajio William point-oni a·bachenge, DC Office gita Tura bajarko napake Hawakhana gita re·baeming apsan biapo matchotatgen ineba NGEA-ni dilgipa parakatjolaha.
