Guwahati, Mar 12: India a·songo transgender ba ‘hizra’-rangni skanggipa cha dokkanko Northeast Frontier Raliway (NFR), All Assam Transgender Association baksa nangrime, Guwahati Railway Station-o kuliaha aro ia cha dokkanko ‘Trans Tea Stall’ ine biming donaha.
Ia cha dokkanko Sukrobar attamo, NFR-ni General Manager Anshul Gupta, do·ga oe on·angaha aro ia cha dokkanko kulie on·angani somoio Transgender Welfare Board of Assam-ni associate vice chairman Swati Bidhan Baruah aro gipin dilgiparangba dongpae bak ra·angaha.
Ia cha dokkanara ‘hizra’-rangni janggi tanganiko dakchakna kulie on·gipa cha dokkan ong·a aro ia cha dokkanko ‘hizra’-rang an·tangtangan chalaienga.
Railway official-rangni parakatani gitade, ian Indian Railways-osan ong·aigja a·songni pilak sorkari organization-rangoba skanggipa ja·ku de·ani ong·aha.
Mikkangchi iandakgipa Trans Tea Stall-rangko salgro salaramni gipin railway station-rangoba NFR kulina miksongenga ineba official-rang parakataha.
