Shillong, Apr 13: Shillong songjinmani Harijan Colony-ko High Level Committee (HLC)-ni recommend ka•ani ba agan-ku•pattianio pangchakesa sorkari apjitanggen ine Budbar salo, Meghalaya a•dokni Deputy Chief Minister Prestone Tynsong parakataha.
Budbar salo, Harijan Panchayat Committee (HPC) baksa tom•e chanchirimangani ja•man, kobor ra•timgiparangna talataniko on•angengon, Harijan Colony-ko apsan biapona apjitangna man•jagenchimoba gipin biaprangonaba apjitatna gita sorkari tik ka•enga ine Tynsong parakataha.
Ia chanchirimanio sorkarini tik ka•giminko Harijan Colony-o songdongenggipa manderangna u•iatskachina gitaba Deputy Chief Minister, Harijan Panchayat Committee-ni membor-rangko didiataha.
Tynsong-ni parakatani gitade, Harijan Colony-o skangoni kam ka•baenggipa aro da•o dongenggipa nokdangrangko man•chape gimik 342 nokdangrang gnang aro uamang pilakan sorkario kam ka•enggiparangan ong•a.
Sorkari baksa chanchirimani bidingo HPC-ni dilgipa Gurjit Singh, talataniko on•angskaengon, ian chu•sokgipa chanchirimani ong•aha indiba ia biapo songdongenggipa gipin manderang baksa chanchirimani ja•manosa uamang an•tangtangni chanchianiko aganna man•gen ine parakatskaaha.
Harijan Panchayat Committee baksa changgipin tom•aniko April 25 tariko ong•atanggen ineba Deputy Chief Minister parakataha.
