Shillong, Mar 7: Meghalaya a•dokoba COVID-19-ni tikarangko matchote su•na jotton ka•engon, health care worker ba sanna banani kamrangko ka•enggipa manderangoniba da•onan 10 percent-de tikarangko su•e ra•tokkujaenga.
Iani bidingo Assembly-o sing•anina aganchakaniko on•angengon, Meghalaya a•dok gimiko tika su•e ra•kugijagipa sak 2,505 health worker-rangoni sak 2,456-de sorkari hospital-rango aro sak 49-de private hospital-rango ong•a ine a•dokni Health Minister James K Sangma parakataha.
Indian Institute of Public Health (IIPH)-ni report-ko on•ani gitade, health worker-rangni tika su•na jechakanio dingtang dingtang a•selrang donga aro uan mitamde tika su•ani ja•man maiba neng•nikanirangko man•na, social media-rango tol•e jangbingbangatanirang, dingtang dingtang samrang dongani gimin badia samrangko ra•gen una jajaani, mitamde bijina kenani, mikkangchi an•o dongna kenchakani aro uandakgipa a•selrangan ong•a ineba Sangma aganaha.
Iani bidingo sorkari, agan-ku•pattie on•ani aro mikrakatani program-rangko ong•atna jotton ka•enga ineba Health Minister parakataha.
A•doko songdongenggipa manderangko tika su•e ra•china didieba, hospital-o kam ka•enggipa doctor aro nurse-rangan tika su•e ra•tokjaenga ong•ode mai dakmesokani sorkari manderangna mesokna man•gen ine iani bidingo All India Trinamool Congress (AITC)-ni MLA Himalaya Shangpliang-ba suk ong•gijaniko parakataha.
Indake ong•genchimoba, agan-ku•pattie on•anirangchi tika su•na jechakenggipa bang•a manderangan da•o tika su•na re•batokengaha ine Health Minister talataniko on•angskaaha.
“A•bachengo tika su•na jechakgipa manderangoni 70-80%-ni gitade da•o tika su•e re•na re•batokaha,” ine ua aganaha.
Agan-ku•pattianirangko ra•enggipa doctor aro nurse-rangara gisikni gita ong•bewalo ong•jaengani gimin sorkari, uamangna chuttiko on•genma ine Gambegre-ni NCP MLA Saleng A Sangma-ni sing•anina aganchakaniko on•angskaengon, agan-ku•pattianirangko on•enga inon doctor aro gipin health worker-rang gisikni gita maiba ong•engani giminsa agan-ku•pattianiko on•enga ong•ja indiba uamangna nangenggipa tikarangara uamangni namgninan ine agan-talataniko on•na ku•pattianisa ong•enga ine Health Minister aganaha.
