Shillong, Dec 3: Meghalaya a•dokni saksa senior police officer Heimonlang Nongpluh, Sukrobar salo, Meghalaya a•dokni gital Chief Information Commissioner ong•e Shillong songjinmani Raj Bhavan-o ku•mikchetaha aro uko uni ku•mikchetaniko a•dokni Governor Satya Pal Malik dilangaha.

H Nongpluh-ko re•anggipa November 29 tariko a•dok sorkari, a•dokni gital Chief Information Commissioner songaha aro ua an•tangni kamko December 1 tariko jako ra•ahachim.

Da•o ua a•dokni Chief Information Commissioner ong•e kamko ra•skaahani gimin niamo pangchake, uni office-tango asongaonide uko police dolonikode saksa neng•takgimin ine chanskagnok.

Meghalaya a•dokni gitcham Chief Information Commissioner Barkose Wajri-na dongimin somoi matchotangaonin a•doko gital Chief Information Commissioner dongkujaengachim ine nikna man•a.