Shillong, April 6: Greater Shillong Water Supply Scheme (GSWSS) Phase-III-ko ia bilsion man·dipet matchotatna man·na gita, department-o kam ka·enggipa sak 112 mang contractual staff-rangko permanent kamo rakkichina gita Hima Mawphlang-ni dabienganiko a·dok sorkari man·adipet chu·sokatna jotton ka·gen ine Mongolbar salo Public Health Engineering (PHE)-ni minister Pa Renikton Lyngdoh Tongkhar-chi tom·dilanganio uamangna ka·dongataniko on·angaha.
Ia project-ko a·bachengatna gita nanggipa a·ako man·na, dolgnini gisepo tik ka·grikgiminko department-ni ja·rikjahani gimin batanggimin bilsi-gittamrangonin GSWSS Phase-III-ni stage-II Pumping Station-ko rikchakataniko Hima Mawphlang champengatahachim.
Tom·ani ja·man kobor setimgiparangna agananio, a·bachengo tik ka·grikgimin gita Hima Mawphlang-ni manderangkon bang·bate department-ni dingtang dingtang kamrango rakkiaha. 1997 bilsina skang kam ka·gipa staff-rangko kamo permanent rakkiaha indiba ua bilsini ja·man kam ka·giparangko da·odipet regularize ka·kuja. “Regularize ka·kugijagipa manderang da·o sak 112 mangni gita department-o dongkuenga. Da·o, Hima-ni mol·molanio pangchake chinga man·adipet nigrike kamrangko ka·angna gita tik ka·aha,” ine Pa uTongkhar talataha.
Jal Jeevan Mission (JMM)ko a·bachengate on·ani bidingo agangenon, on·sogimin gita scheme-oniko namgniko man·gnigiparang, uko nirokatani korosna agreba 5 percent-ko on·gilna nanganiko Hima Mawphlang ra·chakna gita jechakaha ine talatenba, ian tik ka·grikgimin gita Mawphlang-ni manderangna ringani chiringako department-ni indin on·enggipasa ong·ani gimin 5 percent-ko uamang on·gilna gita nangjawaha aro uko nirokatani pilak koroskoba a·dok sorkari chilgen ine uamangna ka·dongataniko on·aha ineba minister agandapataha.
“Ia pilakni bidingo agangrikani ja·man, beben da·alni tom·anio Mawphlang-ni manderang iani gimin mamingkoba tik ka·na man·angjahaoba uamangoniko namgipa aganchakaniko man·aha aro anga bebera·a, pumping station-ko rikchakatna kamko ka·piltaina cholrangko on·ani bidingo uamang ru·utgijan chingna u·iatgen,” ine minister agankuaha.
Ia pilak neng·nikanirangko jensomoio namatna man·ahaon, GSWSS Phase-III-ko ia bilsion matchotatna man·gen ineba Pa Tongkhar an·tangni ka·dongsoanikoba parakataha.
