Tura, Oct 2: Meghalaya Tourism, Meghalayan Age Limited aro ‘trekthehimalaya’-ni nangrime, Darjeeling aro Sikkim-o sal 12-na ong•atenggipa Trek Leader Training Program (TLTP)-o bakko ra•na gita Garo Hills gimikoni sak 25 chadamberang seokako man•aha.
Ia sak 25 chadamberangko Tourism department seokaha aro ia sak 25 chadamberangoni sakbride West Garo Hills, saksnide East Garo Hills, sakskude North Garo Hills aro sakbride South Garo Hills a•jaoni ong•a.
Seokako man•gipa sak 25 chadamberangoni sakbongade me•chikrang ong•a.
Seoka man•gipa chadamberangna Sombar salo, dingtangmancha video conference gita training-ko Tura-ni Circuit House-o ong•atangaha aro uamangna Tourism department-ni official-rang aro uamangna skie on•na sienggipa company-ni official-rang, agan-talatanirangko on•angaha.
Ia program-ko ong•atanio, Tourism department-ni Assistant Director Bulbully S Marak, North Garo Hills-ni Tourist Officer Trida B Sangma, West aro South West Garo Hills a•jani Tourist Officer Ava Shereen Sangma aro East Garo Hills a•jani Tourist Officer Marley Cheang Ch Marak-ba dongpae bak ra•angaha.
Ia training program-ko ong•atani bidingo West aro South West Garo Hills a•jani Tourist Officer Ava Shereen Sangma, Hub News baksa agangrikengon, mikkangchi Trek Guide-ni kamko ka•na sikenggipa chadamberangna ia program-ko ong•atenga aro ia chadamberangan, Himalaya a•brio iandakgipa training-ko Garo Hills-oni ra•chengna sienggiparangba ong•a ine parakataha.
Ia sal 12-ni training-ko October 4 tarikoni a•bachengatenga ine talataniko on•angengon, ia training-o uamang, chubegipa a•brirangko doani bidingo skie ra•anggen ine Sangma parakataha.
Iakoba poraie nina man·gen: Bilsi 10-na ‘Miya’-rangni vote-ko BJP-na nangkujawa: Assam CM
Watch
