Shillong, Oct 05: Vijayadashmi ba Dusshera-ko a·gilsak gimikchi maniengon, Meghalaya a·dokoba apsandake dingtang dingtang a·jarango songdonggipa Hindu-rang Butbar salo maniangaha.
Hindu toromko manigiparangni bebera·ani gita, Dharma ba Hindu manderangni janggi tanggnio niamko ja·rikna nanggnigipako chelchakna gita namgija gisik gnanggipa Manishasura-ni kosako Durga miteni dakgrike cheani gimin Durga Puja ba Vijayadashmi-ko bon·kamgipa salo manirongbaenga.
Maniani chikking gipa salo, Durga mite-ni Lord Shiva baksa Mount Kailash a·briona re·pilanganiko mesokani chin gita Shillong, Polo-o donggipa Wah Umkhrah chibimao Maa Durga mite-ko sim·bole maniangaha.
Mite-rangko chio sim·bolna skangba, Bengali me·chikrang Sindoor Khela-ko dakangaha jeon uamang saksa-sakgipino, vermillion (sindoor)ko tokgrike ba·ra gitchakko gantokaha aro iani miksonganiara Durga miteni cheaniko mesokani chin ong·a.
Indake ong·engon, Dussehra-ni gimin golpoo seani gitade, namgijagipa mande Ravana-ni kosako dakgrike Lord Rama-ni cheaniko manianisa ong·achim. Ia salon, namgija gisik donggipa King Ravana, Kumbhakaran aro Meghanad (namgijagipani chin) iamangni bimangko mangroe tarienba wa·alchi so·aniko dake manironga, indake dakachi ia pilakko mikrongtangchi nikenggipa manderangni gisepo janggi tanganio jedakeba namgijani kosako namgipaan cheronga ine gisik ra·ataniba ong·jola.
Ia manianiko apsandake, A·chik a·songo songdongenggipa gipin jatrang Garo Hills-ni dingtang dingtang biaprangoba Dussehra-ko maniangpaaha.
