Shillong, May 11: Kangalgipa nokdangoni sakanti poraienggipa chatro-chatrirangna mikkangchi dal·a gadango poraidapangna a·dokni state education policy-ni ning·o tangka-paisarangni gita dakchakanirangko on·na scheme-rangko a·bachengate on·china, a·dok sorkario mol·molangenba, Hynniewtrep Integrated Territorial Organization (HITO), a·dokni dakchakgipa skotong minister Pa Sniawbhalang Dhar-ko Bristibar salo grongangaha.

Pa Dhar-ko grongangani somoio, koborna aganangengon, HSSLC-ni result-ko parakatgipao chu·sokangpagipa bang·a chatrorang, nokdangtangtango tangka-paisarangni gita bilgriani a·sel chua gadangrango poraidapangna amsokgijaniko paraktokaha ine HITO-ni padot Donbok Dkhar, parakangaha.

Salni bako a·dokni dakchakgipa skotong minister-ko gronganganio, kangal nokdangoni poraienggipa chatrorangna chief minister relief fund-rangoniko tangka-paisarangko on·enba uamangni poraidapanganina dakchakaniko on·ani bidingo a·dokni skotong minister baksa chanchirime nianiko dakchina gita organisation, minister-ko mol·molangaha ine Dkhar koborna agandapataha.