Shillong, Aug 25: HNLC-ni gitcham dilgipa Cheristerfield Thangkhiew-ko police-ni goe so·otani mamlao, Voice of the people of Mawlai (Sur Ki Nong Mawlai), Meghalaya a·dokni skotong minister, Pa Conrad K Sangma, dakchakgipa skotong minister Pa Prestone Tynsong aro Home Minister Pa Lahkmen Rymbui-maangni bimangrangko tarie Butbar salo so·e jegalaniko dakangaha.
Meghalaya Democratic Alliance (MDA) sorkarini bimangko tarie so·anga baksanaba, Director of General Police (DGP) Chandranathan, East Jaintia Hills-ni Superintendent of Police (SP) Jagpal Singh Dhanao aro SP Traffic (East Khasi Hills District)ni bimangrangkoba unsalo tarichape so·angaha.
Matnanga gita police-ni jakchi goa man·e sianggipa Pa Cheristerfield Thangkhiew-na kragipa bichalko ka·e on·china gita agan-torie dabianganio, Mawlai jolo donggipa hajal manderang Mawlai petrol pump-o jinma tom·dake uamangni ku·cholsan ong·aniko mesokangaha. Indake, mija August 13 tarik walo sianggipani nokko chagropanio Tangkhiew-ko goe so·otanio jak donggipa officer incharge-rangko kam dondipatchinaba dabiangtokaha.
Thangkhiew-ko goe so·otanio jak donggiparangko bakbakan kam dondipatchina gita dabiangkugen aro chinga, peace committee baksaba bakrimjawa ine Seng Samla Mawlai Pyllun (SSMP)-ni padot Samuel Biam parakataha.
Cheristerfield Thangkhiew-ni tanggitik sianganian una bichalko ka·e on·china gita manderangko, mongsongbate dingtang dingtang organisation-rangko apsan ku·cholsan ong·ataha ine Hynniewtrep Youths’ Council (HYC), Mawlai Circle-ni padot Donboklang Kharlyngdoh-ba aganangaha.
Officer incharge-rangko kam dondipatchina gita uamangni dabianiko knachakjani giminba a·dokni home minister Pa Lahkmen Rymbui-koba uamang matnange agananga baksana, iako chu·sokate on·kujana kingking uamang dontongjawa ine janapate, niamni kosako ong·gija kamko ka·giparangna chakengani giminba Kharlyngdoh, a·dokni skotong minister Pa Conrad K Sangma-koba matnangangkuaha.
