Shillong, Aug 17: Re•anggipa August-ni 15 tariko Shillong songjinmani Mawlai jolo so•sojengjeng ong•angani ja•man Shillong songjinmao curfew-ko ra•gatna nangahani gimin Mongolbar salo Mawlai jolni dilgiparang, NGO-rang aro chadambe dolrang, Mawlai-o donggipa Mawdatbaki Indoor Stadium-o jinma tom•enba, ia jolrango ong•enggipa obostarangni bidingo apsan chanchirimangaha.
Tom•a matchotani ja•mano kobor ra•timgiparangna talataniko on•angengon, sorkarini songe on•gipa peace committee-ko uamang ra•chakkujana tik ka•angaha ine Seng Samla Mawlai Pyllun-ni general secretary Samran Syiem parakataha.
“August-ni 13 tariko so•ote galako man•gipa chingni jong-ada Cheristerfield-na kakket bichalko on•china chinga nangnikenga. Cheristerfield-ko so•ote galanio jak donggipa pilak official-rangkon kamoniko ra•galchina chinga nangnikenga,” ine Syiem parakataha.
HNLC-ni gitcham dilgipa Cherish T Syiem-ko so•ote galaniara Mawlai jolo songdongenggipa manderangna dukniko ra•baaha ine talatangengon, internet-ko chipe donatenba curfew-ko ra•gatani a•sel jolo songdongenggipa manderang neng•nikanirangko chagrongna nangtokengaha ine Syiem parakataha.
Mawlai jolrango sipai dolrangko donatkujachina gitaba Mawlai jolni dilgiparang, a•dok sorkariko didiataha.
“Sipai dolrangni kragija dakgipa kamrangna Mawlai jolo songdongenggipa manderang suk ong•tokkujaenga, uni gimin da•o dipet Mawlai jolona police-rangko watatkujachina chinga mol•molenga. Ia jolrango ong•enggipa obostarangko nirokna gita jolni dilgiparangna bilko on•skachina chinga didienga,” ine Syiem aganaha.
Police-rangni silchidareko ra•e katgipa chadamberangkoba silchidareko on•pilchina gita Mawlai-Iewrynghep-ni dilgipa H War didiatskaaha.
Silchidare ra•e katgipa chadamberangni kosako maming ja•kurangko de•jana gita chief minister ku•rachakmanahani gimin jolni dilgiparang, silchidare ra•e katgipa chadamberangni bimingrangko parakjawa ineba War ku•rachakaniko on•angaha.
“Police-rangni silchidareko ra•bae on•china ba badiaba biapo gale donangchina gitasa chinga mol•molenga. Silchidareko badia biapo donenga uko see u•iatna man•aigen,” ine War aganaha.
