Shillong, Oct 20: A·dokoni pilak kamgri dongenggipa chadamberangna a·jani private sector-rango kamrangko on·na man·na gita policy-rangko ra·bachina a·dok sorkario dabienba, Khasi Hill a·jani dolsa organisation, Hynniewtrep National Youth Movement (HNYM) Bristibar salo mande jinma re·jomaniko skotong songjinmao ong·atangaha.
HNYM-ni manderang, Civil Point-oni Main Secretariat, Additional Secretariat-china jinma re·jomange, a·bachengatgipa biapona pil·baani ja·man, organisation-ni president Louis Dohtdong-ni koborna agananganio, private sector-rango a·jatangni kamgrigipa chadamberangna 80 percent biapko a·kangchina aroba a·dokni ning·o donggipa private sector-rango kam on·na gita policy-rangko ra·bachina dabie re·anggipa July jao a·dokni skotong minister-ni jako memorandum-ko on·angahachim, unbaksana mijao matchotanggipa Meghalaya Assembly-ni Autumn Session-na tom·anioba ia mamlani gimin jera ra·grikanggen ine ka·dongsoachim indiba dongchipjaha ine janapataha.
“A·doktangko man·paani da·alo Meghalaya bilsi 50-ko ga·dape maniangpilaha, indiba ia bilsi 50-rango a·dokoni kamgri dongenggipa chadamberangna private sector-rango kam on·na gita a·dok sorkari maming policy-kon ra·bana man·kujaenga, indakgipa kamchin chasong damberangni mikkangchi janggi tanggnini gimin chanchia donggijaniko nikatna man·enga,” ineba Dohtdong agandapataha.
Chadamberang da·alo bang·an kamgri dongna nangtokengani a·selsa ong·gijagipa ramarangonaba sokangenga ine janapatkuan baksa, a·dokni chadamberangna uamangni changa-sapachi dangdike on·pana cholrangko on·na man·na gita policy-rangko ra·bachina a·dok sorkarina chu·gimik sal 45 somoiko on·enga ineba HNYM u·iatjolaha.
