Shillong, Dec 21: A·a-chiko chelna man·jaode, Khasi Hills Autonomous District Council (KHADC), Khasi jatna maming namgni dongjawa ine agananganio, Mylliem Act-oniko “Nongpyniad Shnong” kattako den·galjaode aro Ri-Bhoi a·jao A·chik mandeni an·tangko rangbah shnong ba songni nokma gita ra·engani kosako re·baenggipa bilsi January jani gnigpa antio ja·kurangko de·atjaode KHADC-ko chipatna gita Hynniewtrep National Youth Movement (HNYM), Mongolbar salo ka·mikkenataniko on·angaha.
Mylliem Act-oniko “Nongpyniad Shnong” kattako den·galchina gita district council-na chinga bon·kame somoiko on·enga, maina A·chikrang iachin cholko ra·tokenga, aro chingni a·a-chiko chelchakna man·jaode district council chingna maming namgni dongjawa ine HNYM-ni padot Louis Dohtdong, Mongolbaro koborna aganangaha.
HNYM-ni padotni matnangatani gita, songni-nokni “nongpyniad shnong” dake songako man·eming an·tangko A·chik nokma gita chanenggipa, A·chikrangna, Manipuri, Naga, Punjabi aro Nepali-rangna a·ani lekkarang, a·a palani sakkini lekkarangko skatang on·enganichi uamang Land Transfer Act-ni niamrangko pe·enga.
Mylliem Act-o Nongpyniad Shnong-na u·iatgimin gitade uamang, Nongpyniad Shnong-ni seal-kosan mangmang on·na man·aia, Rangbah Shnong-niko ong·ja ine janapatengon, Garo Hills a·jao Khasi jat saksaba Nokma ong·na man·gija, Khasi jatni daka-rikani niamo maming bak nangepagija Khasi Hills a·jao maidake A·chik mande Rangbah Shnong ong·na man·a ine Dohtdong sing·doangaha.
Janapjolna gita, re·anggipa Sombar salo, All Ri Bhoi Garo Headman Association-ni bimango Ri-Bhoi a·jani A·chik jatrang a·jani dam 56 songrango A·chik jatko songni Nokma dake songaniko ra·chakchina gita jinma re·jomaniko ong·ate jingjengataniko dakangahachim.
