Imphal, Dec 21: Budbar salo, Manipur a•dokni Noney a•jao skul bus gari bolsa a•sel ong•e skulni saksni chatro chatrirang so•otako man•aha aro sak 18-na baten saknaanirangko man•aha ine police-rang u•iataha.

Koborko on•ani gitade, chatro chatrirangko salangenggipa skul bus gari, Longsai jol sambao donggipa Old Cachar ramako re•angengmiting somoio rang•gitik bikpile a•sel ong•aha aro a•sel ong•anichi chatro chatri sakbongade biapon sikamaha aro gipin sak 20 chatro chatrirang saknaaniko man•aha.

Saknaa man•gipa chatro chatrirangko dingtang dingtang hospital-rangona ra•angahachim indiba chatro chatri sakgnide hospital-o siangskaaha.

Saknaa man•gipa bang•bata chatro chatrirangan bilonge saknaanirangko man•ahani gimin sianirang batangkunaba gnang ineba kobor on•aha.

Ia a•sel ong•gipa biapara Imphal songjinmaoni km 55-mang chel•achim.

Police-rangni u•iatani gitade, Thambalnu Higher Secondary School-ni chatro chatrirang annual school study tour-na bus gari bolgnio Noney a•jani Khoupum-ona re•angahachim, jeon chatrirangko salanggipa bus gari bolsa a•sel ong•aniko chagrongna nangaha.
Ia a•sel ong•anina Manipur a•dokni Chief Minister N Biren Singh, an•tangni suk ong•gijaniko parakataha.