Shillong, Mar 22: Re•baenggipa 2023 bilsio Meghalaya Legislative Assembly-ni election-ko ong•atna siengahani gimin Mongolbar salo, MDA sorkario bakrimenggipa Hill State People’s Democratic Party (HSPDP) dolba State Executive Committee-ni tom•aniko ong•ate election committee-ko songna aro election-na kamrangko ka•samsona gita tik ka•e donangaha.
Iani bidingo kobor ra•timgiparangna talataniko on•angengon, ia election committee-o saksni membor-rang donggen aro committee-ko gitcham MLA dilgen ine HSPDP-ni president KP Pangniang parakataha.
Election-na skang badiaba dolrang baksa nangrime kamrangko ka•sogenma ine sing•on, da•o dipet uamang iani bidingo chanchia dongkuja indiba skangonin HSPDP, UDP baksa Regional Democractic Alliance (RDA)-o bakrimengani gimin RDA-ni tom•anio chanchirimna nanggen ine Pangniang parakataha.
Election-na candidate-rangko seokani bidingo election committee chanchianggen ineba HSPDP-ni president parakataha.
MDA-ni bak ong•paengani gimin sorkarini kosako matnanganirangna HSPDP-ba nangchakeaniko man•genma ine sing•on, HSPDP dolba a•doko niam gri koela bikotani aro salruraani bidingo pangnan ku•rangko on•paenga aro ian niam gri dakgipa kamrangode maming nangchakeani dongja ine Pangniang aganaha.
Meghalaya a•dokni mitam songrangko Assam-o napatengani gimin manderangni jegaltokenggipani bidingo sing•on, regional committee-rang name nichengesa aro pilak dolrang baksa agangrikesa kamrangko ka•aha ine HSPDP-ni president parakatskaaha.
