Williamnagar, September 13: Hub News, National Teachers’ Award 2022-ko man·gipa Ma Gamchi Timre R Marak-na kusi ong·chakani nama skaniko on·chengan baksa uni mingnamgipa Uphadiko man·baanio maidakgipa tarisamsoani aro kamrangko dakna nangaha ine sing·on, Ma Gamchi Timre R Marak, indaka Upadhiko man·e kusi ong·an baksa ian A·chik jatna, A·chik a·songna aro Meghalaya a·dokna mikkim rasongko ra·bapana chol ong·ahani gimin ian rasong chana krachongmotgipa ong·a ine aganaha. Beben ua ia Upadhi-ko man·a ka·dongsoani dongjagenchimoba indiba uni nikjumangsogipa be·en pil·anina kusi ong·ani kattarangko aganan baksa uni rakbee jotton ka·anichi chu·sokgipa ong·ani kattarangkoba aganangaha.
Ma Gamchi Timre R Marak-ni aganani gita, ua skigipani kamrangko ru·uta bilsirangna ka·genchimoba aro Upadiko man·pana sikgenchimoba a·song gimiko skigiparangna on·gipa mingnama Uphadi-ko man·pana ka·dongani dongjachim maina ua an·tang Private School-osan ka·paengani gimin bang·bata changon sorkari school-o skigiparangnasa chol ong·bataiachim. Indiba uni District Award-ko man·ani ja·mano uko state level-ona watataha aro National Levelo susaaniko daknaba kraaia ine segipani didianiko man·e dorgastoko on·e nion ra·chakako man·ahachim.
Adita bilsirangna skangsan India a·song gimikoniko Uphadiko man·a kragipa Skigiparangko sak 154-ona ra·doataha aro indita hajal hajal bang·bea skigiparangoni jakomsamangmang seokako man·a susaaniara altua ong·jachim. Unigimin uni tarisamsoanioba altua ong·jachim maina skigipa school-o skiaiasan ong·aija indiba songsalko ra·dona kam ka·na nanganirangba dongachim. Indake uni tarisamsoanio kitapmangmangkosan poraiaigija indiba pilak skigipa ong·e kam ka·gimin kamrangni bidingoba am·kolame tarisamsoaniko dakaha ine ua aganaha.
Hub News, Uko sakgipin skigiparangna ku·patianiko ba agandapaniko on·china aganon, Ma Gamchi Timre R Marak, skigiparangni kamko ongipa gadangni kam gita daknike chone ra·na nangja maina skigiparangan kamtangko name dakjaode ba nama skianiko on·a man·jaode saniba janggiko kal·aming apsana ine aganaha. Ua skigiparango gunrang dongna nangchongmotgiparangni gimin aganengon, on·kanggipa ong·ani, gital nikjagringani gnang skianiko on·ani, niksamsogipa ong·na nanganirangkoba Ma Gamchi Marak aganaha. Indake a·songgimiko skigiparangna on·enggipa mingnamgipa Upadhi-ko man·na tarisamsochina skigiparangna didiani aro ku·patiani kattarangko aganengon, jerangkon skie on·enga ba skie ra·enga uarangko see rakijringna nanga aro nikjumangsoani dongna nanga ine aganangaha.
