Shillong, March 29: Roster system-ni bidingo agan-chanchigrikna a·dok sorkari cholko on·jagenchimode, re·baenggipa salrango a·dokni skotong Shillong songjinmao jingjengataniko ong·atangna gita Hynniewtrep Youth Council (HYC), Butbar salo mikrakataniko on·angaha.
A·doko job reservation policy-ko ja·rikatanio roster system-ko ra·gatskanasienggipao adita chu·ongnikgijanirang gnang ine matnangenba, uko nipiltaichin gita sorkario dabiange, HYC-ni dilgiparang Butbar salo, a·dokni Law minister Ma Ampareen Lyngdoh-ko gronge memorandum-ko on·angaha.
Law minister-ko grongani ja·man, HYC-ni padot Robertjune Kharjahrin, koborni manderangna aganangengon, skotong minister Pa Conrad Sangma-ni agana gita uamang re·baenggipa salrango High court-china re·angani giminba chanchirimgen ine parakataha.
Indake ong·engon, mikkangchi ia mamlani bidingo nanga gita ja·kurangko de·na skangba chinga a·dok sorkari baksa agangrikchengna nangnikenga ineba HYC-ni padot aganangkuaha.
Iana skang, roster system-ni gimin jeba neng·nikanirang donggenchimode uamang kachariona re·angchina gita man·gen ine a·dokni skotong minister, assembly-o aganchakaniko on·angahachim ine nikatna gita man·gen.
Voice of the People Party (VPP)-ba, iana skang, da·o ja·rikenggipa job reservation policy-ko nipiltaiatchina gita a·dok sorkariko didiangan baksana, roster system-ko a·doko ra·gatgniko donchengkuchina gita didiangahachim.
Iakoba poraie nina man·gen: Sohiong consituency-o May jani 10 tariko elekinko ong·atnasia
