Shillong, June 7: Batanggimin 2021 bilsio, Assam Kamrup district-ni Boko-oni ge·sa private godown-oniko mirong bag lak-sako man·ani mamlao Shillong-ni Food Corporation of India (FCI)-ko man·chape a·dokni manderangna sualna miksonggipa mirongko ong·gija jakkalsreta ine matanganirangko a·dokni Social Welfare department-ni minister Pa Paul Lyngdoh, Butbar salo raken jegalatenba ua matnanganirango mamingba pangchakani gri aro chu·gimik mamlako am·sandiatani report-koba man·aha ine aganangaha.

Ia mamlani bidingo a·dok sorkarini aganchakanirangko Meghalaya-ni Account General (AG) mamingo jeani grian ra·chakangaha aro apsandake AG-oniba a·dokni mirongko jakkalsreta ine matnanganirango maming pangchakani gri ine talataniko on·angahani gimin iano a·dokni manderangna miksonggipa mirongko jakkalsretaha ine aganna gita man·jawa ine minister talatangaha.

Matnanggimin gita, ua mirongrangko man·gipa a·jani police-rang ia mamlao bakrime kamrangko ka·a dongbrejani a·selo ia mamlara namen ja·manchakaha ine parakatan baksa, iandakgipa cha·bokani mamlarango matnanga man·pagipa dolrangko aro department-ko indinari ong·gija matnanganirangko salpinapako man·jana gita mikkangchide sandirokatanirango somoiko donna gita nangenga ineba Pa Lyngdoh parakataha.

Indake ong·engon, ia mamlako chu·gimik jakgitele sandirokatna gita a·dok sorkari batanggimin somoio ge·sa committee-ko songangahachim ine nikatna gita man·gen.