Shillong, Nov 1: Khasi manderangni aro mongsongbate Meghalaya a•doko songdongenggipa manderangni nangnikanirangko da•o Rajya Sabha-ni session-ko a•bachengatani somoio ra•angna man•na gita Sombar salo, Meghalaya a•dokni Rajya Sabha MP Dr WR Kharlukhi, Khasi Author Society baksa NEHU Shillong Campus-o agan-golpogrikangaha.
Iani bidingo kobor ra•timgiparangna talataniko on•angengon, Meghalaya a•doko ra•gatchina dabienggipa Inner Line Permit (ILP) aro Indian Constitution-ni Eighth Schedule-o Khasi ku•sikkoba ra•gatchina dabienggipani bidingo ua Rajya Sabha-ni session-o ku•rangko on•egen ine Kharlukhi parakataha.
Iarangni bidingo Lok Sabha-osa ku•rangko on•na nangbatenga ineba Kharlukhi parakataha.
Da•o ong•enggipa Lok Sabha-ni MP-ko GG Swell gita ong•china didiatengon, ia sal somoirango MP-rang GG Swell sagi gita ong•janaba dongaha maina uni somoiode ua aganahaon pilak MP-rangan jrip donge knatimtokrongachim ine Kharlukhi parakataha.
Mikkang bilsiode Meghalaya a•dokko man•chengaoni bilsi 50 gapengahani gimin a•dokni nanganirangko ma•mong sorkari chu•sokate on•na nangengahachim ineba a•dokni Rajya Sabha MP aganaha.
