Shillong, Dec 4: “BJP mikkang samgniko mesoke kal·e ronabe. Meghalaya BJP ILP na am inna man·ja ; ma·mong BJP man·jawa ine aganskaa, ian na·songni rong manchako mesoka“ ine lekka aro ba·ra rango see nangdimgimin Confederation of Meghalaya Social Organisations dolni ILP ko a·doko ra·gatchina dabitaiani somoio jinmana mesokataha.

ILP ko a·doko nangengani bidingo ma·mongni Home Ministry na u·iate dakchakpachina inenba CoMSO ni dilgiparang Governor Pa. Satyapal Malik ko gronge molmole maini gimin jolni manderangna ILP ko nanga aro ILP chi maidake chel·chakniko man·gen uko talataha ine CoMSO ni dilgipa Roy Kupar Synrem kobor segiparangna aganaha.

Governor, chingni grongeanio an·tangni chakpaaniko janapaha aro bil ama dipetde Governor ni gadango dakchakna kusi ong·begen aro uni bidingo Ma·mongni Home Ministry ona koborrangko sokatgen ine aganaha ineba Roy Kupar janapaha.

CoMSO ni aganani gitade Meghalaya Resident Safety and Security Bill ni file da·o Governoron ong·kuenga, gitcham Governor Pa. Tathagata Roy ni somoio uko March jao ra·gatahaoba file ko Pa. Malikni kamona re·baan ja·mano watattaiaha, uno seanirangko ua da·o nirikkienga.

Bill, a·dokni manderangko chelchakgipa, naljokatgipa aro kenani gri ong·atgipa ong·ode ua pangnan soi ka·na tarie donga uni gimin namgipa sal somoi ko chakchike senge dongbo ine Pa. Malik ka·dongani kattarangko CoMSO dolna aganaha.

Governor ko grongan ja·mano pilak chanchirimanirang namen chu·sokaha ine ILP ko nangnikenggipa CoMSO dol aganaha.