Tura, Dec 4: Meghalaya a•doko Inner Line Permit (ILP)-ko ra•gate on•china dabianiko ma•mong sorkari chu•sokate on•kujaengani gimin, sorkarini kosako suk ong•gijaniko mesokna gita Sukrobar salni bako a•dokni dingtang dingtang dolrangni nangrime bikotgipa Confederation of Meghalaya Social Organisations (CoMSO)-ni membor-rang, Meghalaya a•dok gimikon asonge jingjengatangaha.
Garo Hills-o CoMSO-ni membor-rang, Tura, Williamnagar aro Resubelpapara DC office mikkango asonge jingjengatangenba, a•doko ILP-ko aro Meghalaya Residents Safety & Security Amendment Act (MRSSA)-ko ta•raken ra•gatchina chrik a•boke aro poster-rangko see dabiangtokaha.
Ia sit-in-demonstration ba asonge jingjengataniko ong•atani bidingo CoMSO-ni vice chairman aro GSMC-ni chairman Nikman Ch Marak, kobor ra•timgiparangna u•iatengon, Meghalaya a•doko aro mongsongbate Garo Hills-o Inner Line Permit (ILP) gita dakgipa niamrang dongkujani a•selan gipin biaprangoni manderang niam gri napdrabae songdong a•chatokna man•enga aro ian a•doko songdongenggipa Tribal jatrangna kenchakna nangani ong•enga ine talatangenba, iani giminsa a•doko songdongenggipa Tribal jatrangna ILP-ko nangchongmotenga ine parakataha.
Manipur, Nagaland, Arunachal Pradesh aro Mizoram a•dokrango ILP-ko ra•gatna man•ahaode maini gimin Meghalaya a•doko ILP-ko ra•gatna man•skajaenga ineba CoMSO-ni dilgiparang, ma•mong sorkariko sing•doangaha.
Ia apsan salon, CoMSO-ni membor-rang Shillong songjinmaoba jinma asonge jingjengataniko dakangaha aro a•dokni Governor Satya Pal Malik-koba gronge Meghalaya a•doko ILP-ko ra•gatchina didiangaha.
Meghalaya a•dokni Chief Minister Conrad Sangma-ni dilanichi a•dokni sak 60 MLA-rangko, New Delhi-ona re•ange ILP-na dabienggipani bidingo ma•mong sorkarina ku•rangko on•echina gitaba CoMSO dabiangaha.
