New Delhi, Jan 16: Da·ororo giproroenggipa sabisina tika su·aniko da·al Sonibar pringni bako a·songni Prime Minister Narendra Modi, video conference-ko dakanichi a·bachengate on·angaha.
“Sabisini tikako basako man·gen ine manderang ango sing·tokengachim. Ia tikako da·o man·engaha. Ia tikako a·bachengatna man·ahani gimin anga a·songo songdongenggipa mande sakantinan an·tangni namgipa skaniko on·na ska,” ine Prime Minister Modi parakataha.
“Pangnande iandakgipa tikarangko tarina gita somoirangko bang·e nangrongachim indiba ia changode India a·songo tarigipa tika minggniko bakkandikbegipa somoion matchotna man·aha. Gipin tikarangkoba ta·raken tariengaha,” ineba Prime Minister aganaha.
Oxford University aro Bharat Biotech-ni tarigipa tika minggnini skanggipa bako India a·song gimikni kror gittam healthworker aro frontline worker-rangna on·angchengengachim.
Ia tikarangko da·aloni a·bachenge su·angengon, ia skanggipa salni bako a·song gimikni lak gittam healthcare worker-rangna a·song gimikni dam 3000 biaprango su·angenga.
Ia tikako su·anichi India a·songo sabisi giproroaniko champengna man·gnok ineba a·songni Prime Minister Narendra Modi parakataha.
“Iandake dal·begipa tika su·aniko itihaso changsaba ong·ata dongkuja. Mande jelbra jelsuanio kror gittamna komigipa dam 100-na baten a·songrang gnang aro ia skanggipa bakon India a·songo kror gittam manderangna tikarangko su·enga. Gnigipa bakode an·ching sak kror 30 manderangna tikarangko su·skana nanggen,” ine Modi aganaha.
