New Delhi, Dec 27: India a·songni dingtang dingtang biaprango an·tangtangan cleaning drive ba jinma rongtalatanirangko dakjringengani gimin dingtang dingtang dolrangko a·songni Prime Minister Narendra Modi mittelpilangenba, a·songko plastic jakkalani grigipa a·song ong·atna ku·mikchetchina gita a·songo songdongenggipa manderangko didiangaha.
“Jabolrang maikai sagal rikamrangona aro a·brirangona sokangenga an·ching skanggipa name chanchichengna nangenga. Ia jabolrangko sawa ia biaprangona sokatenga, uan an·ching an·tangtangan ong·enga. Uni gimin mikkangchi an·ching jabolrangko skatang galjana gita ku·mikchetna nangenga,” ine a·songni Prime Minister Narendra Modi aganaha.
A·songo songdongenggipa mande sakantian skatang jabolrangko galjana gita ku·mikchetna nanga maina ian Swachh Bharat Abhiyan-ni skanggipa ku·mikchetani ong·a ineba Modi aganaha.
“Coronavirus-ni a·sel anga na·simang baksa iani bidingo bang·e agangrikna man·kujaenga indiba da·alo anga na·simangko iani bidingo gisik ra·atna nangnikenga. An·ching an·chingni a·songko plastic jakkalani grigipa a·song ong·atna nangenga aro ian 2021 bilsina an·ching sakantini ku·mikchetani ong·china,” ine Prime Minister parakataha.
