Shillong, Feb 28: Indian Army-o junior commissioned officer (JCO) aro operational requirement (OR) staff-rangko rimani niamrangko adita dingtangataha ine Indian Army-ni official-rang u•iataha.
Army official-rangni u•iatani gitade, skanggipa gadango register ka•e joinindianarmy.nic.in (JIA website) gita dorgasto galgipa pilak candidate-rang, common entrance exam (CEE)-ko sena nanggen aro gnigipa bako, bakkandikate seoka man•gipa candidate-rangko physical fitness test aro physical measurement test-na ARO-rang, recruitment rally-ona okamatgen. Gittamgipa gadango seoka man•gipa candidate-rang, rally ong•atgipa biapo medical test-ko ka•na gita nanggen.
Online gita register ka•na JIA website-ko February 16 tarikoni March 15 tarikona kulie dongen indiba register ka•ani ba biming segatani niamrangde skango gitan apsan ong•aigen ine Army official-rang u•iataha. Candidate-rang an•tangtangni Aadhar card ba Class 10-ni certificate-ko jakkale register ka•na man•gen.
Online CEE-ko India a•songni dam 176 biaprango ong•atenga aro candidate-rang, porikka sechakna gita dambonga biaprangoniko seokna man•gen. CEE-na candidate sakprako gong 500-ko fee dake ra•gen indiba 50 percent-kode Army gamgen. Registration ba biming segatani matchotao, candidate-rang, gong 250/-ko bank-na gamna nanggipa korosrang baksa Internet Banking, UPI/BHIM ba credit ba debit card-rangko jakkale, Maestro, Master Card, VISA ba RuPay card-rangko man•chape pilak mongsonggipa bank-rango gamna nanggen.
Online CEE-ko sena gita candidate-rang, Join Indian Navy website-oniko porikkana sal 10-14-na skangan admit card-rangko ra•na man•gen.
Candidate-o maiba jajaani ba ma•sidapna nanganirang donggenchimode, uandakgipa candidate-rangna agan-talate on•na gita dingtangmancha helpdesk-koba donmanaga aro iani bidingo Join Indian Navy website-oniko nie ra•na man•gen. Online CEE-ni bidingo sing•sandina nanganirang donggenchimode 7996157222 mobile nombor-ona ka•atna man•gen.
