Shillong, April 24: Shillong-oni 101 Area-ko songchengaoni chu·gimik bilsi 60 ga·dapaniko gisik ra·na gita, Indian Army, Sombar salo, Shillong-o donggipa Indian Army-ni Headquarters 101 Area-o Diamond Jubilee-ko maniangaha aro ia salko gisik ra·e manianganio, Indian Army-ni General Officer Commanding in chief (GOC-in-C), Lieutenant General RP Kalita, a·songtangna janggitangko on·chake sianggipa sipairangko Rhino Prerna Sthal, Shillong War Memorial-o mande ra·anikoba dakangaha.
A·songtangna sichakgipa sipairangko apsandake, 101 Area-ni Officiating General Officer Commanding (GOC), Major General RK Jha baksana Headquarters 101 Area-ni pilak sipairangba dingtangmancha gisik ra·e uamangko mande ra·pilskaanio bakko ra·angtokpaaha.
A·bachengao, 101 Communication Zone ine minggipa 101 Area-ni sipairangko skang 1963 bilsini April 22 tariko salgro-salaram jolchipak China a·songni sipairangko warachakna gita songchengahachim, uandaken HQ 101 Area-ni sipairang ua somoio dingtang dingtang biaprango China-ni sipairangko warachaksoanio Indian Army-ni combat operation-rang gimikon chu·gimik bakko ra·angpaaha.
1966 oni 1969 bilsiona, Mizoram a·doko Counter-Insurgency operation-rangko ong·atgipaoba uamang bakko ra·angaha. Unbaksana, 1971 bilsio dakgrikmiting somoioba, skangni somoio East Pakistan ine chanako man·gipa jekon, da·alo Bangladesh ine ma·sina gita man·enga, HQ 101 Area-ba Sylhet aro Mymensingh district-rango operation-rangko ong·atgipao bak ra·angtaikuaha, uandake 1971 bilsini December 16 tarik pringo, 101 Area-ni sipairangan Dacca-ona sokechenggiparang ong·aha jechin, attamchibara Pakistan-ni sipairang an·tangtangko bame on·aona sokaha aro iachin, 101 Area-ni sipairangna ‘First in Dacca’-ni bimingkoba on·jolaha.
Ia dingtangmanchagipa salko gisik ra·e manianganio, Major General RK Jha, sakanti sipairangna an·tangni namgipa sikanirangko on·angaha, indake, GOC-in-C Eastern Command, 101 Area-ni sipairangna aganprakanganio, a·songna an·tangtangko on·kange dangdike on·baenganiko chasongrangna rakkibaenganina sipairangko dingtangmancha de·mittele aganangskaaha.
Chu·gimik bilsi 60 rangna kingking a·songna dangdike on·baenganiko gisik ra·ani bak gita, special cover aro stamp-rangko oprake on·angan baksa, 1971 bilsio dakgrikmiting somoio, 101 Area-ni GOC-rang ong·e dangdike on·anggipa Major General Gurbaksh Singh Gill aro Major General Gandharv Nagra-maangni bimangko ka·baksrek tarigipa mangkrongkoba oprake on·angjolaha.
Salni bako, mija April 9 tariko, Rhino Riders-ni Motorcycle Rally-ko Rhino Training Complex Shillong-oni a·dokni Governor Pa Phagu Chauhan-ni jakchi a·bachengate on·anggipa dolkoba Lt Gen RP Kalita, rimchaksoaniko dakangjolaha. Motorcycle sale re·jomaniko dakanggipa sipairang, Azadi ka Amrit Mahotsav-ni bilsiko maniani bak gita a·songtangna on·kanganiko gisik ra·atpile manianio Meghalaya, Assam, Mizoram, Manipur, Nagaland aro Arunachal Pradesh a·dokrangona kingking songreangenba, dingtang dingtang manderangko gronge agangrikanirangkoba dakangjolaha.
