Tura, April 24: Tura-ko Winter ba Second Capital songchina dingtang dingtang dolrangni dabianio Tura Government College Students Union (TGCSU)-ba chakpaaniko parakataha.
TGCSU-ni president Anand Ch Momin-ni parakatani gitade, 1972 bilsio Meghalaya a•dokko man•chengani somoion Tura-ko Winter ba Second Capital songna gita dilgiparangni gisepo songgigrikani dongachim aro da•o Tura-ko Winter Capital songaniara Meghalaya a•dokko man•na krengdilanggipa pagitchamrangni jumangko chu•sokatani gita ong•genchim.
Tura-ko Winter Capital songkujaengani a•selsa a•doko songdongenggipa mongsonggipa jatgittamni gisepo meli-nangrimanirang dongjaenga ine janapatengon, a•dokni gipin mongsonggipa jatrang, Garo jat ba Garo Hills-ni gimin name ma•sitokkujaenga ine TGCSU-ni president parakataha.
Bilsiantian Tura-ko October jaoni March jaona Second Capital songna nanga ine dabiangengon, ia dabianiko chu•sokatkujaskal TGCSU-ba Tura-ko Winter Capital songchina dabienggipa dolrang baksa bakrimangkugen ine Momin parakataha.
