Shillong, Jan 8: Meghalaya aro Bangladesh a•songni simako fencing kaani ba kapengani kamrang bakan matchotgnok ine Border Security Force (BSF) parakatenba, ia biap damgnini gisepo donggipa simarangko 70 percent-ni gitade kapengmanaha ine talatangaha.
“Meghalaya aro Bangladesh a•songni gisepo donggipa kilometre 443 simaoni da•o 70 percent-kode chu•gimik fencing kamanaha aro kapengkugijagipa biaprangkoba kachina gita ge•etaniko on•e da•o kamrangko ka•engaha,” ine Sukrobar salo BSF Meghalaya Frontier-ni Inspector General (IG) Hardeep Singh parakataha.
Ia biaprango kapengani kamrang bakan matchotgnok ine an•tangni ka•dongchakenganiko parakatengon, badiaba biaprangode fencing kana gita Bangladesh sorkarini ra•chakanirangkoba nangengkua aro uamang bakan Bangladesh sorkarini u•iatanirangko man•sona ka•dongenga ine BSF-ni IG parakataha.
Zero line-o fencing kachina dabienggipani bidingo sing•on, “Badiaba badiaba biaprango songdongenggipa manderang zero line-o fencing kachina dabienga indiba Bangladesh sorkari baksa songgigrikani gitade, border-oni 150 yards batede iandakgipa fencing-rangko kana bil dongja,” ine Singh talataniko on•angaha.
Fencing kana gita a•arangko man•kujaenggipani bidingo BSF dol, dingtang dingtang deputy commissioner-rang aro a•dokni Chief Secretary baksa agangrikmanaha aro da•o ia biaprangoba bakan fencing-ko kagnok ineba BSF Meghalaya Frontier-ni IG parakataha.
