Shillong, June 25: International Day against Drug Abuse and Illicit Trafficking-ko skotong songjinmao maniani gita Meghalaya State Legal Services Authority, Shillong-ni office-o “Share Fact on Drugs, Save Lives” chong·motan pekatgipa samrangni gimin kakketgipa kattarangko manderangna on·e, uamangni janggirangko naljokatbo ine pangchakaniko donenba Sukobar salo webinar-ko ong·atangaha.
Salni tom·anio, “Roles of Headmen in Handling Matters Relating to Drugs” chong·motan Pekatgipa samrangko jakkalanirango nangchape Headmen ba Nokmarangni ka·gni kamrang ine katta bichongko done chanchirimangaha.
Pekatgipa samrangni bidingo nokmarangna ma·siate on·achi uamangni bil ama gita iandakgiparangko maikai warachakna man·gen ia miksonganio, pekatgipa samrangko jakkalachi namgijaona sokangani gimin aro iandakgipa kamrangko champengna dakchakanirangko on·ani gimin mikrakatanirangko on·na gita dingtangmancha nisanko done webinar-ko ong·atangaha.
Tom·ao mongsonggipa ong·e agangiparangara, Meghalaya State Legal Services Authority-ni District and Sessions Judge cum Member Secretary, Pa N A Khan, jean pekatgipa samrangko ra·e nokmarangni ka·gni kamrangni gimin aganangaha, indake, East Khasi Hills district-ni Superintendent of Police (City), Pa Vivek Syiem, aro Deputy Superintendent Police (City), Pa Banrap Jyrwa-maang, Meghalaya a·doko niam gri pekatgipa samrangko badingsrukani bidingo agan-talate on·angtokskaaha.
Meghalaya Users Forum-ni padot Pa Neil Khongwir-ba tom·ao bak ra·angpae an·tangni ma·sianirangko jinmana aganprakangaha.
