Guwahati, June 25: Udalguri-ni Tangla Municipality Board (TMB)-o donggipa wa•grimrangko den•e galanichi, ru•uta bilsirangna dongenggipa rokomsa alabokrangni bitiprang nisie galako man•aha.
Koborko on•ani gitade, ia wa•a grimo do•orang ki•engani a•sel COVID-19-ko giproroatna dakchakani ong•enga ine nikenba, ia wa•a grimko den•e galna nangenga ine re•anggipa June 8 tarikon administration-ni gita jolo songdongenggipa manderangna u•iataniko on•manahachim.
Indake ong•genchimoba, jolo songdongenggipa manderang, ia wa•arangko den•e galtokjahani gimin Bristibar salo Tangla Municipality Board-ni gita den•e galskaaha aro uandaken ia wa•a grimo donggipa rokomsa alabokni bitiprang nisie galako man•tokaha.
Do•orangni bitiprangko iandake nisie galahani gimin Don Bosco University-ni ning•o donggipa Wildlife Sciences-ni assistant professor Nilutpal Mahanta, local adminstration-ni kosako badi ka•doangskaaha.
“Science-ni gita maming sakki gri, do•o ki•irangara COVID-19-ko giproroatna man•a ine official-rang, songni manderangko dilsretaha,” ine Mahanta parakataha.
Mahanta-ni parakatani gitade, ia wa•a grimo mang 300-na baten rokomsa alabokrang janggi tangengachim aro ia do•orangoni bang•batan atchidaldalrangsa ong•achim.
Indake ong•engon, Kaziranga-oni WTI official-rang, bangki dongkuenggipa do•orangko naljokatna gita ia biapona re•baenga ine kobor on•aha.
