Shillong, June 25: Meghalaya a•doko antigimikan COVID-ko man•giparang sak 400-oni sak 600-ni gisepon ong•e dongahaoba Sukrobar salo COVID-ko man•dapgiparang sak 602 ong•taiaha aro uandaken da•oba changsataie a•doko COVID man•ani sak 600 batangtaiaha.
Meghalaya a•doko aro mongsongbate songadam nokadamrango ia corona virus-ni ‘Delta’ rokomko man•aniba manderangna namen mikrakna nangani ong•engaha maina Bristibar salsani gisepon song damsaode sak 70 manderang COVID-ko man•aha.
Ia sal somoirango West Garo Hills aro West Jaintia Hills a•jarango COVID man•giparang batenga aro batanggimin konta 24-ni gisepon West Garo Hills a•jao sak 126 aro West Jaintia Hills a•jao sak 119 manderang COVID man•dapaha ine Sukrobar attamchibara health official-rang parakataha.
Re•anggipa Sonibar saloni ia Sukrobar salona West Garo Hills a•jao sak 415 manderang COVID man•dapaha aro ia apsan somoion West Jaintia Hills a•jao sak 471 manderang COVID man•dapskaaha.
Official-rangni kobor on•ani gitade, Bristibar salo, West Garo Hills a•jani Daren Agal songo sak 70 manderang, ia COVID-19-ni ‘Delta’ rokomna porikka ra•anio positive ong•aha.
Ri Bhoi a•jaoba salantian COVID-ko man•giparang sak 50 batrongenga aro Sukrobar saloba sak 84 manderang COVID man•dape, antisani gisepon Ri Bhoi a•jao COVID man•giparang sak 488 gapangaha.
Meghalaya a•doko COVID-19 man•chengaonin East Khasi Hills a•jaon batgipa ong•enga aro Sukrobar saloba sak 134 manderang COVID man•daptaienba, antisani gisepon COVID man•giparang sak 916 gapangaha.
COVID man•giparangni nampilskaaniko niatgenchimode Sukrobar salo sak 345 manderang nampilna gita man•aha indiba ia apsan salon sak 602 manderang COVID man•dapskaahani gimin nampilgiparang namen komibataha ine nikatna man•a.
Da•o dipet Meghalaya a•dok gimiko COVID-oni nampilgiparang gimik sak 42,001 gapengaha aro COVID man•e dongenggiparanga sak 4,665 gapskaengaha.
