Shillong, Jan 6: Uttar Pradeshni Varanasio 2021 Decemberni 27 oni 30 tarikona ong•atgipa, Indo-Nepal International Taekwondo Championship 2021-o Meghalaya a•dokoni Taekwondo Training Academy (MTT) ge•chikking medalrangko chebaaha.
Ia MTT academyara, Meghalaya Taekwondo association baksa nangrime kamrangko ka•enga aro Meghalaya a•dokni palo a•doktango aro Indiani gipin staterangoba taekwondo kal•susaanirango bakko ra•rongenga.
Ia Indo-Nepal International Taekwondo championship 2021 kal•susaanio Meghalaya a•dokoniba me•a-me•chik gimik-gimang sak chi•sa kal•susagiparang bakko ra•paaha.
Lanosaha Marbaniang, Wansalan Dkhar, Francis Hek aro Sangeeta Rabha, gold medalrangko chebaaha. Micheal Syiemlieh aro Vikas Kumar Rabha silver medalko man•baskaaha aro Ujjwal Burma, Chandana Hajong Vrinder aro Pradeep Sing iamang bronze medalrangko chebae a•dokna mikkim-rasongko ra•baaha.
Ia kal•susaanio India a•songni dol chi•dok taekwondo kal•susagiparang, Nepal a•songni sak sotdok kal•susagiparang baksa bakko ra•angaha.
Kobor ra•timgiparangna, gold medalist Wansalan Dkharni aganani gitade, uamangni MTT academy, kal• susaanio bakko ra•na gita darangni tangka-paisachi dakchakaniko man•pajaha. Meghalaya sorkarini sports department aro Meghalaya Taekwondo Association uamangna dakchakjaomangba adita sak MLArangni tangka-paisako on•e dakchakaniko man•e uamang kal•susaanio bakko ra•na man•paaha.
” Bang•bata kal•susaanirangon chinga an•tangtangni tangkatangchi aro nokdangtangtangni dakchakanichisa bakko ra•na man•rongenga. Uni gimin chinga a•dok sorkariko aro sports departmentko, ia chingni dolna ba kal•susaaninaba gisik on•pachina mol•molna namnikbea” ine Dkhar agandapaha.
