Tura, Jan 24: Bajengdoba-oni Tura-ona re•baenggipa manderangko corona sabisina porikka ra•aniko gitcham biap Inter Service Bus Terminus (ISBT), Chasinggre-oniko Tura Civil Hospital Flu Clinic (TCHFC)-ona ra•jitangaha ine West Garo Hills-ni Deputy Commissioner u•iataha.

Uni gimin sajinmana porikka ra•aniko January 23 tarikdipet TCHFC-o ra•angskagnok ineba u•iataha.

Chasinggre-o donggipa ISBT-o ru•utgijan bus garirang ua biaponi re•chakattaignok ineba DC u•idapatangaha.

Unbaksana public transport ba bara salenggipa bus garirango skang gita apsan dake manderangko gate salna man•gnok, indiba Motor Vehicle Rules-o pangchake mask-rangko ganna nanggen.

Apsandake manderangko salruraenggipa bus garirang gitcham gari barako ra•angpilchina ge•etanikoba on•jolangaha. Maina corona sabisini a•sel pilak gari bararangko bariatahachim da•o uarangko skangogitan apsan bararangko ra•angtaipilgnok ineba DC u•iatangjolaha.